Pengingat enda betulis sejarah Iban dikait enggau pengamat sereta jerita bukai

Pengingat enda betulis ti dikembuan orang tuai ba senentang sejarah Iban kelia dikaitka pengamat enggau sejarah bukai ke bisi nyadi maya nya,”ku Prof. Madya DR. Neilson Ilan Mersat.

DR. Neilson ke nyadi siku pemansik sejarah penatai Iban ari Indonesia ke Sarawak dalam taun 1400 ngagai 1840 madahka pengingat sejarah ke enda direkod nya enggai nyadi dikumbai bula sengapa.

“Ba pengawa aku ngempuru penerang tauka pengingat sejarah lama ari orang tuai, aku seruran mandingka cherita nya enggau sejarah ke udah direkod maya cherita nya nyadi.

“Aku betanya ngagai kaling ti landik ba pekara sejarah baka Hikayat Merong Mahawangsa tauka Raja Besiung. Lebuh aku mandingka maya nya nyadi, sejarah nya sebaka enggau cherita Beji ti udah ditusuika aku ba program sehari tu,”ku Iya.

Iya mansutka penerang tu lebuh nyaut tanya dalam program Polemik ‘Petempatan Di Sarawak Dari Tahun 1400 hingga 1840 Masehi ’ Sejarah Malaysia sesi ke 27 ti diatur di Palan Penerang Islam (IIC) Jalai Ong Tiang Swee ditu.

Ku iya, cherita Beji suah dikaitka enggau pejalai bansa Iban ari Ketapang, Indonesia tama ke Sarawak. Ba abad ke 16, sepengudah ninga cherita petara diau dilangit ti ditusui orang dagang Arab ti ransing ngerembaika ajar Islam, Beji lalu ngaga tangga ba atas pun Entepung dikena niki ke langit ketegal ke deka betemu enggau petara. Lebuh dipansik, pengerembai ajar Islam di Sarawak nyadi sama maya enggau cherita Beji ti ngaga tangga ke langit.

Kitai mega patut meratika cherita ‘Pelayaran Munsyi Abdullah’ ti udah meda siku orang Dayak ti bepantak penuh tubuh, tandu iya.

Dalam program ke diatur Arkib Negara Malaysia nya, DR. Neilson ke mega Dekan Fakulti Sains Sosial UNIMAS bisi mantaika asil pansik ba senentang ‘Sejarah Awal Migrasi bansa Iban di Sarawak’ alai iya nyeritaka pejalai bansa Iban ari Kapuas, Indonesia tama ke Sarawak nengah menua Kumpang sebedau jeman perintah Rajah Brooke.

Ku iya, pejalai bansa Iban di Pulau Borneo nempuh timpuh ti amat panjai lalu udah ngadaka sebengkah pekara ti dikumbai Iban Diaspora di pulau tu.

“Taja pia, baka bansa bukai ke bisi di Asia ti laun nerima urup, semua sejarah nya enda direkod. Mayuh penerang semina direkod sepengudah Rajah Brooke datai.

“Berindik ari nya, sejarah di Sarawak sebedau jeman Brooke enda tentu ditemu lalu jurai senentang pejalai bansa Iban ke Sarawak semina bepelasarka pengingat ti enda ditulis baka ke udah digaga Benedict Sandin,” ku iya.

Ketegal ti kurang sejarah direkod dalam timpuh taun 1400 ngagai 1840, Arkib Negara Malaysia setuju ngena pengingat ti enda ditulis ari orang tuai nyadi sebengkah agi penerang sejarah ti diguna.

Diatu, kelimpah raban pemansik ari universiti, Tun Jugah Foundation sereta Majlis Adat Istiadat mega ransing ngempuru semua sejarah Iban ti diulih ari penerang orang ke dulu.

Patut tauka enda pengerami Ngiling Bidai diintu ngelui ari bulan June

Pengerami ngiling bidai nya pengerami bansa Iban dikena sida nutupka pengerami gawai. Nitihka penemu rama sekeda ari bala Iban madahka timpuh ti pemadu manah ngatur pengerami Ngiling Bidai dikena nutup Gawai Dayak ti diintu ninting taun kena 1 Jun, iya nya 30 Jun.

Siku orang ke nemu pasal adat Iban, iya nya Jimbun Tawai (Utusan Borneo, 29 Jun 2014) madahka maya ngatur pengerami Ngiling Bidai enda patut ngerampit bulan bukai kelimpah ari dalam bulan June. Jimbun tu kala nyadi Pengajar Lati Jaku Iban. Diatu iya gawa nyadi Sapit Pemesai Pemansik Rama ba MAIS. 

Pekara bekaul enggau ngatur pengerami Ngiling Bidai entara pekara ti kala dipejuraika dalam aum Majlis Adat Istiadat Sarawak (MAIS).  Nama rasional pengerami ngiling bidai mesti diintu enda ngelui ari bulan June?

Nitihka aum MAIS, timpuh ngatur pengerami Ngiling Bidai nya anang ngerampit bulan Julai, Ogos enggau bulan bukai. Nitihka sida, diperambuka maya ke patut iya nya 30 Jun. Lalu enti deka ngerami ngelui ari timpuh nya (30 June) patut diberi nama bukai, anang meri nama pengerami Ngiling Bidai.

Laban enti diperundingka enggau ngena, bidai tauka ke dianchau maya Gawai Dayak enti kelalu lama enda digiling, ngujungka tikai nya kamah. Nya mih kebuah anang kelalu lama ngiling iya. Bansa Dayak patut bisi basa adat enggau main asal diri empu ti dipeturun ari aki ini nitihka rurun atur pengawa ti nyemetak.

Timpuh ti kelalu lama mega deka mandangka kitai Dayak tauka Iban nyau baka ngayanka nadai basa ngagai adat enggau main asal diri empu. Enti kitai ke empu adat enggau main asal nya enda ulih bebasaka nya, bansa bukai tentu mega nadai basa ngagai kitai adat enggau main asal kitai. Tu mega nyengkaum  atur pengawa Ngiling Bidai. Ambika banding raban bansa bukai lebuh ngintu pengerami sida pan bisi timpuh lalu enda kelalu lunggar. Sekeda chunto nya baka pengerami Taun Baru China ti diintu naka 15 haribulan dalam taun kelinda China. Baka nya mega pengerami Hari Raya Aidil Fitri ti diintu dalam kandang sebulan iya nya dalam bulan Syawal.

Nya alai, baka nya mega pengerami Ngiling Bidai tu endang enda patut diatur kelalu lunggar tauka ngerampit bulan July enggau bulan ke bukai, enggaika kitai diketawaka bansa bukai

Pengingat Ari Gawai

Hari Gawai Dayak tu siti ari pengerami ti diintu di Sarawak ninting taun kena 1 Haribulan Jun. Iya diintu semua pupu raban bansa Dayak. Nya alai iya hari diau ke semua rayat di Sarawak laban sida bela ngerami hari nya. Maya hari tu, sida ke bansa Dayak ti diau di nengeri tauka di menua pesisir kiruh nyambut penatai pengabang ke datai besun-sun.

Hari Gawai Dayak udah nyadi hari besai kenyau ari taun 1964 udah bekau Council Negeri ti ngemasukka iya ba Gazette nengeri Sarawak lebuh 25 Haribulan September 1964. Hari Gawai Dayak terubah iya diintu dalam taun 1965.

Raban bansa Dayak kelebih sida ke nembiak rebak baru kemaya hari tu patut bendar temegah ati sereta beterima kasih ngagai tuai raban bansa Dayak baka Datuk Tra Zenhnder ke udah bendar amat minta hari nya dikemendarka perintah. Peminta nya udah didinga Kepala Menteri menua Sarawak keterubah iya, Datuk Stephen Kalong Ningkan enggau bala menteri iya lebuh nya suba.


Pemutus runding perintah ke ngemendarka Hari Gawai nyadi hari diau nya mai besai bendar reti ke raban bansa Dayak. Iya ukai semina nyadika tanda bansa bukai ngelala sereta bebasaka bansa Dayak tang iya mega nyadika tali penanchang ngagai mayuh raban bansa Dayak ti ngujungka sida ulih beserakup sereta begulai sejalai dalam semua pengawa.


Kemaya hari tu Hari Gawai udah pegari tampak rita di menua Sarawak. Iya diintu ngena mayuh macham pengerami ke mandangka pengaya adat asal bansa Dayak ba menua tu. Bansa ke ukai peturun Dayak ti enda sama pengarap enggau sida nadai sanggu datai ngabang lebuh Hari Gawai. Enti sida enda ulih datai, suba sida ngirumka kad pesan Selamat Hari Gawai, tang kemaya hari tu ketegal ubah pemasang dunya, kad nya tadi diganti enggau pesan jaku pandak ke taip sereta dikirum nengah telefon binching tauka dikenataika nengah emel tauka facebook. Nya alai Gawai Dayak tetap nyadika lambang pupu raban bansa di Malaysia. Ketegal tu, iya udah narit ati bala temuai ari menua bukai.